Kalibo, Aklan – June 25, 2025 – Ro Philippine Statistics Authority Aklan hay nagapahisayod sa publiko eakip man sa ‘relying parties’ kapareho ku mga establisimyento ag opisina nga ginabawae ro pag imprinta it digital national ID sa Polyvinyl chloride (PVC) o ilaminate sa ‘plastic’.

Ro digital national ID hay du ‘digital version’ ku atong national ID ag daya hay makita ag ma ‘access’ paagi sa pag download it e-Gov app. Ro hayga o ‘value’ nana kara hay kapareho man sa national ID card ag papel nga gina isyu it PSA kon gamiton sa mga transaksyones.

Ogaling kon dayang digital national ID hay iga-imprinta, nangin owa ra it hayga ag ngani indi dapat gamiton o batunon bilang pruweba it pagkakilaea o ‘proof of identity’.

Suno sa Republic Act 11055 o Philippine Identification System Act, ro PSA eamang ro may awtoridad nga mag imprinta ag mag-isyu it national ID sa ano mang klaseng porma kapareho it card, sa papel, ag sa digital.

Tungod kara, sin-o man nga indibidwal o grupo nga madakpan nga nagahimo it pag imprinta it digital national ID hay mapangatubang it nagakaigo nga penalidad nga pagkapreso it tatlo hasta an-um nga dag-on ag multa nga P1M hasta P3M.

Ngani, ginahinyo gid it PSA sa tanan nga sundon ro dayang palisiya para malikawan ro ano man nga problema angot sa bagay ngara.

Dugang man, du PSA Aklan hay nagalibot sa mga establisimyento ag opisina para maghiwat it ‘Information, Education, and Communication’ (IEC) nga mga aktibidades para sa dugang nga impormasyon hanungod sa national ID.

Engr. Antonet B. Catubuan
Chief Statistical Specialist