Ang opisina kang Philippine Statistics Authority sa probinsya kang Antique nakigbahin sa ginhiwat nga Medical-Dental-Civic Action Program (MedCAP) sa Barangay Pangalcagan, Bugasong, Antique kadyang Oktubre 29, 2024.

Gindara kang PSA ang mobile registration para sa pag-agum kang mga pumuluyo kang andang National ID, kag ang Birth Registration Assistance Project ukon BRAP para sa mga pumuluyo nga wara pa narehistro ang andang pagkabun-ag agud makaagum sanda kang andang mga Birth Certificate paagi sa delayed ukon late birth registration nga libre kag sa mahulas nga pamaagi. Libre man ang kopya kang Birth Certificate nga igatugro sa mga aplikante pananglitan makumpleto ang proseso kang rehistrasyon.

Nagkalain-lain nga mga problema sa mga dokumento sa rehistro-sibil parehas kang birth certificate ang ginpaabot kang mga pumuluyo kag ginpaathag ukon gintugroan laygay kang mga katapo kang PSA.

Nag-agto man ang mga katapo kang PhilSys Team kang PSA sa kaipi nga mga kabarangayan agud matinguhaan marehistro para sa National ID ang iba nga mga pumuluyo nga wara nakaagto mismo sa lugar kang pagtiriripon.

Ang hirikuton ginpangunahan kang Provincial Task Force to End Local Communist Armed Conflict (PTF-ELCAC) kag ginpakigbahinan kang duro kag nagkalain-lain nga mga ahensya kang gobyerno nga nagdara kang nagkalain-lain man nga mga serbisyo kag nanagtag kang nagkalain-lain nga mga bulig kag kagamitan para sa mga pumuluyo kang magkaipi nga kabarangayan kang Pangalcagan, Igsoro, Yapu, Tono-an, Maray kag Anilawan sa nabukid nga bahin kang banwa kang Bugasong nga nagdugok agud makaagum kang gintanyag nga mga serbisyo.

Imaw sa mga serbisyo ang libre nga konsultasyon sa ikaayong lawas kag libre nga mga bulong, paggabot kang unto, pagpagunting kang buhok, pagtuli ukon circumcision kag iba pa. May libre man nga igma kag pamahaw nga gintigana ang gobyerno lokal para sa tanan nga mga nagtambong sa masadya nga kahiwatan sa pihak kang mainuranun nga panahon.