Kalibo, Aklan – May 5, 2025 – Uman nga nagapanawagan ag nagahinyo ro lokal nga taeatapan it Philippine Statistics Authority iya sa Probinsya it Akean sa tanan nga mga pumueoyo ag residente it probinsya nga owa pa makapa-interbyu sa ginpatigayon nga 2024 Census of Population and Community-Based Monitoring System (Popcen-CBMS) ku nagtaliwan nga dag-on nga mag-imporma sa andang opisina para mabisitahan ag mabue-an it nagakaigo nga datos ku andang mga data collectors.

Suno kay Engr. Antonet Catubuan, Chief Statistical Specialist it PSA-Aklan, ro pagpartisipar it kada tawo sa census hay importante agud nga masayuran ro aktwal nga numero it populasyon ku barangay, munisipyo, probinsya ag nasyon nga ginagamit it gobyerno bilang basehan sa paghimo it mga plano ag polisya para sa pagpaumwad it komunidad.

Pinaagi sa census, bukon eang ro kaabo it tawo ag panimaeay ro masayran kundi pati man ro demographic characteristics it populasyon kapareho it age-sex distribution, literacy, education ag iba pa agud maka-alokar it husto nga resources ro gobyerno ag makabaeay it nagakaigo nga programa para social ag economic development.

Sa pihak nga bahin, ro CBMS mat a hay nagakolekta it sari-sari nga mga datos it kada indibidwal ag panimaeay agud ma-determina it gobyerno ro mga pumueoyo nga matuod-tuod nga nagakinahang-ean it bulig.

Eowas sa demographic data, ginabuoe man sa CBMS ro mga impormasyon kapareho ku solo parenthood, disability, migration, current school attendance, employment, health, nutrition, water, sanitation, safety and security, shelter, ag iba pa nga ginagamit sa pag evaluate ag pagsukat it iba-ibang mga targets sa Sustainable Development Goals. 

Suno kay Engr. Catubuan, sambilog sa pinaka gamit it data halin sa dayang CBMS hay ro pag determina it bag-ong mga benepisyaryo it Pantawid Pamilyang Pilipino Program (4Ps) it Department of Social Welfare and Development agud mabuligan datong mga kubos ag owa-owa gid sa pangabuhi nga sektor it atong susyodad. 

Dahil kara, importante nga ro kada tawo suno kana hay mainterbyu sa CBMS agud makaibahan sa listahan it iga-evaluate it Department of Economy, Planning and Development (DEPDev), (dati anay nga National Economic and Development Authority o NEDA) ag DSWD para sa nasambit nga programa.

Gindugang pa ni Engr. Catuabuan nga tsansa man ra it datong mga indibidwal nga owa maeakip sa ulihi nga listahan it 4Ps beneficiaries ag nagakinahang ean it kapareho nga ayuda halin sa gobyerno nga makaibahan sa dayang programa.

Hasta lang sa May 15, 2025 ro pagtao it extension it PSA-Aklan sa datong owa pa ma-census. 

Sa mga interesado, pwede nga magtawag sa andang numero sa 268-9217/09479503115. Pwede man magpadaea it mensahe sa  PSA-Aklan Facebook Page o magbisita sa andang opisina nga nahamtang sa Redepermavic Bldg, North Capitol Site, Estancia, Kalibo, Aklan.

ANTONET B. CATUBUAN
Chief Statistical Specialist