KALIBO, AKLAN – Ro presyo it baeak-eonon ag serbisyo sa Aklan hay nagnaba ku Abril it dayang dag-on pagkatapos nga mairekord ro -1.2% inflation rate sa kabilugan it probinsya base sa ginapatigayon nga surbey it Philippine Statistics Authority Aklan.

Daya ro pinakamanaba nga porsyento it inflation nga narekord umpisa ku Abril 2019, nga may -0.1%.

Sa lima ka probinsya sa Region VI, nagapangaywa ro Aklan sa may pinakamanaba nga inflation rate sa nasambit nga buean kasunod it Antique nga may -1.6%.

Suno sa PSA Aklan, sa 13 nga ka-commodity groups gina monitor it ahensya. Ro mabahoe nga pagnaba it inflation hay na obserbahan sa Food and Non-alcoholic beverages nga nag- angkon it -4.2% kumpara sa 10.1% sa parehus nga buean ku nagtaliwan nga dag-on. Raya ro mayor nga nagtueod para magnaba ro pangkabilugan nga inflation sa Aklan.

Ginasundan ra it Transport commodity group nga may -0.5% inflation, partikular kara du pagnaba it presyo it gasolina nga nag-angkon it -12.1% inflation halin sa 1.0% inflation ku nagtaliwan nga dag-on.

Ro madasig nga pagnaba it inflation sa pagkaon dayang buean hay tungod sa pagnaba it inflation it bugas nga may -18.7%, tinuean-on nga may -9.1%, partikular kara du presyo it sibuyas ag kamatis, ag isda nga may -1.5%

Angot kara du pagnaba it inflation rate dayang Abril 2025 hay nagpasaka it purchasing power of peso (PPP) sa Aklan nga mangin 81 sentimos halin sa 80 sentimos ku Abril 2024. Bueot hambaeon, du kaya bak-eon it sanglibo nga mga produkto ag serbisyo sa Aklan sang Abril ku nagtaliwan nga dag-on hay mabakae eamang sa mga P994 piso karang Abril 2025 - mas manubo it P46 piso.

Ro inflation hay du kabilugan nga pagtaas it presyo it ga baeak-eonon ag serbisyo sa pag-ilis it tyiempo. Bueot hambaeon kun magtinaas du inflation, naga nubo du haeaga it piso. Daya du natawag nga purchasing power of peso kun siin ginapakita du deperensya it kaya nga bakeon it piso sa isa partikular nga tuig kumpara sa base year (2018).

Importanteng masayuran du daya nga mga impormasyon tungod may mabahoe daya nga epekto sa mga konsyumidor dahil apektado ro presyo it mga kinahang-eanon nga produkto ag serbisyo. Ro pagtaas, pagnubo ukon paghinay it inflation hay nagaapekto sa kapasidad it

mga tawo nga maggasto. Kung nagataas ro inflation, nagabuhin ro puwersa magbakae it kwarta – mas mabudlay bak-eon ro parehong produkto ag serbisyo sa dati nanda nga presyo.

ANTONET B. CATUBUAN
Chief Statistical Specialist